Bukas ang ‘Bulig Ilonggo Help Desk’ sang Iloilo Provincial Government (IPG) sa mga nagapangayo bulig nga pamilya sang Ilonggo Overseas Filipino Workers (OFWs) nga yara sa Afghanistan, kay nagapangatubang sa krisis politikal ang nahinambitan nga pungsod sa diin gilayon nga gin mandu sang gobyerno nasyonal ang pagpapauli sang mga OFW sa Pilipinas.

Suno kay Public Employment Service Office (PESO) Head Francisco Heler wala pa sang OFW nga nagatrabaho sa Afghanistan okon pamilya sang OFW sa probinsya nga nagpakig-angot kag nagpangayo ulig sa ila opisina tubtub subong.

Kon madumduman gintukod sang tuig 2019 sang lokal nga panguluhan sang probinsya ang ‘24/7 inter-agency task force’ para magbulig sa sa mga Ilonggo nga papulion sa Iloilo gikan sa Middle East kasunod sang tensyon sa tunga sang US kag Iran.

Ang pagtukod sang help desk inisyatibo ni Governor Arthur Defensor Jr. sa pagpamuno sang PESO.

Ginpaathag ni Heler nga ang Bulig Ilonggo isa ka task force nga ginabug-usan sang nanuhaytuhay nga ahensya sang gobyerno pareho sang Overseas Workers Welfare Administration, Department of Labor and Employment, Department of Foreign Affairs, Department of Social Welfare and Development kag iban pa.

Sa karon bangud kulang ang personnel sang mga nahinambitan nga mga ahensya kag may ginaatubang nga pandemya dala sang COVID-19, ang PESO Iloilo na lang ang nagahikutar sang mga ‘concern’ sang OFW nga nagadangop sa ila.